Madhuri Dixit

Madhuri Shankar Dixit (1967-yil 15-mayda Mumbayda tug'ilgan) — mashhur hind aktrisasi va mohir Kathak raqqosasi. U 70 dan ortiq hind filmlarida suratga tushgan. 80-yillarning oxiri va 90-yillarda o'zining iste'dodi, go'zalligi va betakror raqs mahorati bilan Bollivudning yetakchi aktrisalaridan biriga aylangan. OAV uni tez-tez Bollivudning eng yaxshi aktrisalaridan biri sifatida e'tirof etadi. Olti karra Filmfare mukofoti sohibasi (to'rt marta «Eng yaxshi aktrisa», bitta «Eng yaxshi ikkinchi darajali aktrisa» va bitta maxsus mukofot). 13 ta nominatsiya bilan «Eng yaxshi aktrisa» yo'nalishida Filmfare rekordchisi. 2008-yilda Hindiston hukumati tomonidan mamlakatning to'rtinchi darajali oliy mukofoti — Padma Shri bilan taqdirlangan. «Tezaab» (1988), «Dil» (1990), «Beta» (1992), «Hum Aapke Hain Koun..!» (1994) va «Devdas» (2002) kabi filmlari unga katta shuhrat keltirgan. Kino karyerasidan tashqari, u mashhur raqs shoularida hakamlik qilgan va UNICEF orqali bolalar huquqlarini himoya qilish bilan shug'ullanadi. Yurak-qon tomir jarrohi Shriram Nene bilan turmush qurgan, ikki o'g'li bor.