Lionel Messi

Lionel Andrés Messi (1987-yil 24-iyun) — argentinalik professional futbolchi, hujumchi. Hozirda Inter Miami klubi va Argentina terma jamoasi sardori. Futbol tarixidagi eng buyuk o‘yinchilardan biri hisoblangan Messi sakkiz karra Ballon d'Or, olti karra Yevropa Oltin butsi sovrindori va sakkiz marta FIFA talqiniga ko‘ra dunyoning eng yaxshi futbolchisi deb topilgan. 2021-yilgacha u faoliyatining asosiy qismini Barselona klubida o‘tkazib, 34 ta sovrin, jumladan, o‘n marta La Liga, yetti marta Copa del Rey va to‘rt marta UEFA Chempionlar ligasida g‘olib chiqqan. Milliy terma jamoa safida 2021-yilgi Copa América va 2022-yilgi FIFA Jahon chempionatida zafar quchgan. Messi La Liga tarixidagi eng ko‘p gol urgan (474), eng ko‘p xet-trik qayd etgan (36) va eng ko‘p golli uzatmani amalga oshirgan (192) futbolchi hisoblanadi. U Janubiy Amerikalik futbolchilar orasida xalqaro maydondagi eng ko‘p gol (106) muallifi hamda faoliyati davomida jami 800 dan ortiq gol urgan.