Lilik Sudjio

Lilik Sudijo (1930-yil 14-may — 2014-yil 9-dekabr) — indoneziyalik aktyor va kinoijodkor. Lilik (ba'zan "Liliek" deb ham yoziladi) o'z faoliyati davomida 75 ta loyihada qatnashgan. Mashhur indoneziyalik teatr aktyori Astamaning o'g'li bo'lmish Sudijo sahnada ilk bor otasi bilan birga Astaman Jr. nomi bilan chiqqan. 1949-yilgi "Saputangan" (Ro'molcha) filmida kichik rol ijro etib kinoga kirib kelgan va yana bir nechta aktyorlik ishlaridan so'ng kamera ortida ishlashga qaror qilgan. Dastlab klatper boshqaruvidan tortib ssenariy yozishgacha bo'lgan yo'lni bosib o'tgan Sudijo 1954-yilda o'zining rejissyorlikdagi debyuti — "Tarmina" filmiga qo'l urdi. Ushbu kartina keyingi yili Indoneziya kinofestivalida "Eng yaxshi rejissyor" va "Eng yaxshi film" uchun Citra mukofotlarini qo'lga kiritdi. 60-yillarning boshlarida AQShga, L.A.dagi Kaliforniya universitetida kino san'atini o'rganishga borishdan oldin u yana bir qancha filmlarni suratga oldi. Sudijo yillar davomida turli janrlardagi filmlarga rejissyorlik qilgan, ssenariy yozgan va montaj qilgan. U vatanidan tashqarida eng ko'p o'zining qora jodu mavzusidagi mashhur "The Queen of Black Magic" (1981) dahshatli filmi bilan tanilgan. Bu uning AQShda kinoteatrlarda namoyish etilgan sanoqli filmlaridan biri edi. 1989–1990-yillarda "Misteri dari Gunung Merapi" ("Merapi tog'i siri") turkumidagi uchta jangovar-fantastik film ustida ishlagach, kinorejissyorlikni yakunlagan va 2014-yilda vafot etgan.