Lil Dagover

Taniqli nemis kinoaktrisasi 1887-yil 30-sentyabrda Yava orolining Madiven shahrida golland rasmiylari xizmatidagi o‘rmonchi oilasida tug‘ilgan. O‘n yoshida o‘qish uchun Baden-Badenga yuborilgan. 1917-yilda o‘zidan 25 yosh katta bo‘lgan aktyor Fritz Dagoverga turmushga chiqqanidan so‘ng kino olamiga kirib kelgan. 1919-yilda ajrashganlariga qaramay, turmush o‘rtog‘i uni rejissyor Robert Wiene va nemis kinosining boshqa taniqli shaxslari bilan tanishtirishga ulgurgandi. U kinodagi debyutini Fritz Langning «Harakiri» (1919) filmida qilgan. Ko‘p o‘tmay, Wienening klassik ekspressionistik «Doktor Kaligari kabineti» (1920) filmida suratga tushgan. 1927-yilda Shvetsiya, 1928-1929-yillarda Fransiya va 1931-yilda Gollivudga qilgan safarlaridan tashqari, Lil Dagoverning butun ijodiy taqdiri nemis kinosi bilan bog‘liq bo‘lib, u ko‘pincha zaifa va qiynalgan qahramonlar rollarini ijro etgan. U natsistlar davrida ham ko‘plab filmlarda suratga tushishni davom ettirdi. Eng yaxshi ijrolari qatorida «Congress Dances» (1931), Gerhard Lamprechtning «The Higher Command» (1935) va Veit Harlanning «The Kreutzer Sonata» (1937) filmlaridagi rollari bor. Shuningdek, Berlinning «Deutsches Theatre» teatrida, Zalsburg festivalida va urush davri teatrlari sahnasida ham faoliyat yuritgan. Bir paytlar Adolf Hitlerning yaqin do‘sti bo‘lgani haqida xabarlar tarqalgan. 1944-yilda «Urush xizmatlari xochi» bilan mukofotlangan. Dagover urushdan keyingi Germaniyada ham o‘z faoliyatini davom ettirib, 1970-yillarning oxirigacha ko‘plab ikkinchi darajali rollarni ijro etgan.