Leslie Cheung

Cheung Kwok-Wing (1956-yil 12-sentabr – 2003-yil 1-aprel) — gonkonglik va kanadalik xonanda hamda aktyor. Gonkongda tugʻilib oʻsgan Leslie Cheung 1971-yilda Buyuk Britaniyaning Lids shahriga koʻchib oʻtgan va u yerda universitetda kiyim dizayni yoʻnalishi boʻyicha oʻqigan. Oʻqishni tugatgach, Gonkongga qaytib, 1977-yilda ATV Asian Music Contest havaskorlar qoʻshiq tanlovida ikkinchi oʻrinni qoʻlga kiritgan. Keyingi yili u oʻzining ilk albomi — "I Like Dreaming"ni chiqaradi. Koʻp oʻtmay televideniyeda koʻrina boshlagan va oʻzining ilk filmidagi rolini "Erotic Dreams of the Red Chamber" (1978) erotik kartinasida ijro etgan. 1977-yildan to vafotigacha boʻlgan 26 yillik ijodiy faoliyati davomida u 40 dan ortiq musiqa albomini chiqarib, 56 ta filmda rol oʻynagan. 1980-yillarda Gonkong pop-musiqasi (Cantopop) qiyofasini shakllantirgan eng taniqli ijodkorlardan biri boʻlgan. Uning "Summer Romance" (1987) va "Most Beloved" (1995) studiyaviy albomlarining har biri 300 ming nusxadan ortiq sotilgan. Musiqadan tashqari, Cheung "A Better Tomorrow" (1986) va "A Chinese Ghost Story" (1987) kabi filmlari orqali Osiyo boʻylab shuhrat qozongan. 1990-yilda "Days of Being Wild" filmidagi ijrosi uchun Gonkong kino mukofotining "Eng yaxshi aktyor" unvoniga sazovor boʻlgan.