Leonardo DiCaprio

Leonardo Wilhelm DiCaprio (1974-yil 11-noyabrda tugʻilgan) — amerikalik aktyor va prodyuser. Biografik va tarixiy filmlardagi rollari bilan tanilgan DiCaprio „Oskar“, BAFTA va uch karra „Oltin globus“ mukofotlari sohibidir. 2019-yil holatiga koʻra, uning filmlari dunyo boʻylab 7,2 milliard dollardan ortiq daromad keltirgan va u dunyoning eng koʻp haq oladigan aktyorlari yillik reytingida sakkiz marta yuqori oʻrinlarni egallagan. Los-Anjelesda tugʻilgan DiCaprio oʻz faoliyatini 1980-yillarning oxirida televideniye reklamalarida qatnashishdan boshlagan. 1990-yillarning boshlarida u „Parenthood“ sitkomi kabi turli teledasturlarda qatnashib, ilk yirik kino roli yozuvchi Tobias Volf obrazini „This Boy's Life“ (1993) filmida ijro etgan. 19 yoshida u „What's Gilbert Grape“ (1993) filmida rivojlanishida nuqsoni bor bola rolini oʻynagani uchun tanqidchilar olqishiga sazovor boʻldi hamda ilk bor „Oskar“ va „Oltin globus“ mukofotlariga nomzod boʻldi. U „Romeo + Juliet“ (1996) va „Titanic“ (1997) filmlari orqali xalqaro miqyosda shuhrat qozondi. Soʻnggi tilga olingan film barcha zamonlarning eng koʻp daromad keltirgan kartinasiga aylangach, u bir necha yil davomida ish hajmini kamaytirdi. Romantik qahramon imidjidan qutulish maqsadida DiCaprio boshqa janrlardagi rollarni, jumladan, „Catch Me If You Can“ (2002) va „Gangs of New York“ (2002) kabi jinoyat dramalarini tanladi; oxirgi film rejissyor Martin Scorsese bilan koʻplab muvaffaqiyatli hamkorliklarining boshlanishi boʻldi. DiCaprio „The Aviator“ (2004) filmida Howard Hughes rolini gavdalantirgan va oʻz ijrosi uchun yuqori baholarga sazovor boʻlgan.