Laura Dern

Lora Elizabet Dern (1967-yil 10-fevralda tugʻilgan) — amerikalik aktrisa. U "Oskar", "Primetime Emmy", BAFTA mukofotlari va beshta "Oltin globus" mukofoti sovrindori. Aktyorlar Bryus Dern va Dayan Ladd oilasida tugʻilgan Lora 1980-yillarda aktrisalik faoliyatini boshlagan va Piter Bogdanovichning "Mask" (1985) hamda Devid Linchning "Blue Velvet" (1986) va "Wild at Heart" (1990) filmlaridagi ijrosi bilan tanilgan. U "Rambling Rose" (1991) drama filmidagi yetim Rouz roli uchun "Eng yaxshi aktrisa" yoʻnalishida Oskar mukofotiga nomzod boʻlgan va "Afterburn" (1992) televizion filmidagi ijrosi uchun ilk "Oltin globus" mukofotini qoʻlga kiritgan. Stiven Spilbergning "Jurassic Park" (1993) sarguzasht filmidagi Elli Sattler roli unga xalqaro miqyosda shuhrat keltirdi, u bu rolni keyinchalik "Jurassic Park III" (2001) va "Jurassic World Dominion" (2022) qismlarida ham ijro etgan. "Recount" (2008) televizion filmidagi Ketrin Xarris va "Enlightened" (2011–2013) komediya serialidagi Emi Jelliko rollari uchun ikki karra "Oltin globus" mukofotini qoʻlga kiritganidan soʻng, Dern "Wild" (2014) biografik filmida Sheril Streydning onasi rolini oʻynab, ikkinchi Oskar mukofotiga nomzod boʻlgan. U "Big Little Lies" drama serialida Renata Kleyn obrazini gavdalantirib, Primetime Emmy va "Oltin globus" mukofotlarini yutib oldi, shuningdek, Devid Linch bilan "Inland Empire" (2006) va "Twin Peaks: The Return" (2017) loyihalarida yana hamkorlik qildi. Shuningdek, u "Star Wars: The Last Jedi" (2017) filmida ham suratga tushgan.