Kirsten Dunst

Kirsten Dunst — amerikalik aktrisa. Karyerasini 1989-yilda "New York Stories" antologik filmida boshlagan. U bir necha nufuzli mukofotlarga, jumladan, "Oskar", "Emmi" va to'rt marotaba "Oltin globus" mukofotlariga nomzod bo'lgan. Dunst ilk bor 1994-yilda suratga olingan "Interview with the Vampire" filmidagi yosh vampir Claudia roli bilan e'tirof etilgan va bu roli uchun "Oltin globus" nominatsiyasini olgan. U "Little Women" (1994) va "Jumanji" (1995) filmlarida bolalik yillarida rollar ijro etgan. Aktrisa 1999-yildan boshlab o'smirlarga mo'ljallangan filmlarda, jumladan "Dick" va "Drop Dead Gorgeous" satirik kartinalari hamda Sofia Coppola'ning "The Virgin Suicides" dramasida bosh rollarni ijro etgan. "Bring It On" (2000) filmidan so'ng, Sam Raimi'ning "Spider-Man" trilogiyasidagi Mary Jane Watson obrazi orqali dunyo miqyosida mashhur bo'ldi. Shuningdek, "Eternal Sunshine of the Spotless Mind" (2004), "Elizabethtown" (2005) va "Marie Antoinette" (2006) filmlarida suratga tushgan. 2011-yilda Lars von Trier'ning "Melancholia" dramasidagi roli uchun Kann kinofestivalining "Eng yaxshi aktrisa" mukofotini qo'lga kiritgan. 2015-yilda "Fargo" serialining ikkinchi mavsumidagi ijrosi uchun "Emmi" mukofotiga nomzod bo'lgan.