Kerry Washington

Kerri Marisa Vashington (1977-yil, 31-yanvar) — amerikalik aktrisa. U «Emmi» mukofotiga sazovor bo'lgan hamda ikki karra «Oltin globus» va «Toni» mukofoti nomzodi hisoblanadi. 2014-yilda «Time» jurnali uni dunyoning eng nufuzli 100 kishisi ro'yxatiga kiritgan. Vashington ABC telekanalining «Mojarolar» (2012–2018) drama serialidagi inqirozni boshqarish bo'yicha ekspert Oliviya Poup roli orqali katta shuhrat qozondi. Ushbu roli uchun u bir necha bor «Emmi» va «Oltin globus»ga nomzod bo'lgan. Shuningdek, HBO'ning «Tasdiqlash» (2016) siyosiy filmi va Hulu'ning «Hamma joyda kichik yong'inlar» (2020) miniserialidagi ijrosi bilan ham e'tirof etilgan. Aktrisa 2000-yilda «Bizning qo'shig'imiz» filmi bilan katta kinoda debyut qilgan. U «Fantastik to'rtlik» (2005, 2007) filmlarida Alisiya Masters rolini ijro etgan, shuningdek, «Rey», «Janob va xonim Smit», «Shotlandiyaning so'nggi qiroli», «Django ozod etildi» kabi turli janrdagi filmlarda rol o'ynagan.