Kenneth Branagh

Sir Kenneth Charles Branagh (1960-yil 10-dekabrda tugʻilgan) — britaniyalik aktyor va kinoijodkor. Belfastda tugʻilib, asosan Berkshire'ning Reading shahrida ulgʻaygan Branagh Londondagi RADA'da tahsil olgan va 2015–2024-yillarda uning prezidenti boʻlgan. Uning mukofotlari qatoriga Oscar, toʻrtta BAFTA, ikkita Emmy, Oltin globus va Olivier mukofotlari kiradi. U 2012-yilda ritsar unvoniga sazovor boʻlgan va 2018-yilda oʻzi tugʻilib oʻsgan Belfast shahrining faxriy fuqarosi boʻldi. 2020-yilda The Irish Times nashrining Irlandiyaning eng buyuk kino aktyorlari roʻyxatida 20-oʻrinni egallagan. Branagh William Shakespeare pyesalari asosidagi bir nechta filmlarni suratga olgan va ularda bosh rollarni ijro etgan, jumladan: "Henry V" (1989), "Much Ado About Nothing" (1993), "Othello" (1995), "Hamlet" (1996) va "As You Like It" (2006). U "Henry V" filmi uchun "Eng yaxshi aktyor" va "Eng yaxshi rejissyor", shuningdek, "Hamlet" uchun "Eng yaxshi moslashtirilgan ssenariy" nominatsiyalarida Oscar mukofotiga nomzod boʻlgan. Uning "Swan Song" (1992) qisqa metrajli filmi Oscar mukofotiga sazovor boʻlgan. Shuningdek, u "Peter's Friends" (1992), "Mary Shelley's Frankenstein" (1994), "Thor" (2011) va "Cinderella" (2015) filmlarini boshqargan. Oʻzining avtobiografik xarakterdagi "Belfast" (2021) filmi uchun Oscar mukofotining "Eng yaxshi film" va "Eng yaxshi rejissyor" nominatsiyalariga loyiq koʻrilib, "Eng yaxshi original ssenariy" yoʻnalishida gʻolib chiqqan. Branagh 2017-yildan beri davom etayotgan Hercule Poirot filmlar seriyasida bosh qahramon Hercule Poirot rolini oʻynab, uni oʻzi suratga olib kelmoqda. Shuningdek, u "Celebrity" (1998), "Wild Wild West" (1999), "The Road to El Dorado" (2000), "Harry Potter and the Chamber of Secrets" (2002) kabi filmlarda suratga tushgan.