Kate Hudson

Kate Garry Hudson — amerikalik aktrisa. Oltin globus mukofoti va Oskar nominatsiyasi kabi qator nufuzli mukofotlar sohibasi. Qo'shiqchi Bill Hudson va aktrisa Goldie Hawnding oilasida tug'ilgan Hudson 1998-yilgi „Desert Blue“ dramasi orqali kino olamiga kirib keldi, shundan so'ng bir nechta filmlarda ikkinchi plandagi rollarni ijro etdi. Cameron Crowening „Almost Famous“ (2000) musiqiy dramasidagi Penny Lane obrazi unga katta shuhrat keltirdi va bu roli uchun u „Eng yaxshi ikkinchi plandagi aktrisa“ yo'nalishida Oltin globus mukofotini qo'lga kiritib, Oskar mukofotiga nomzod bo'ldi. 2000-yillar davomida Hudson ketma-ket romantik komediyalarda bosh rollarni ijro etdi, ular orasida „How to Lose a Guy in 10 Days“ (2003), „You, Me and Dupree“ (2006), „Fool's Gold“ (2008) va „Bride Wars“ (2009) filmlari eng mashhurlari hisoblanadi. Televideniyeda u „Glee“ (2012–2013) musiqiy serialida takrorlanuvchi rolni ijro etgan bo'lsa, „Truth Be Told“ (2022) serialining ikkinchi mavsumida bosh rolni o'ynagan. Shuningdek, uning boshqa filmdagi ishlari qatoriga „The Skeleton Key“ (2005), „Nine“ (2009), „Rock the Kasbah“ (2015), „Deepwater Horizon“ (2016), „Mother's Day“ (2016), „Music“ (2021) va „Glass Onion“ (2022) filmlari kiradi. Hudson TechStyle Fashion Group tomonidan boshqariladigan „Fabletics“ fitnes brendi va a'zolik dasturining asoschilaridan biridir. U shuningdek, „Pretty Happy: Healthy Ways to Love Your Body“ (2016) va „Pretty Fun: Creating and Celebrating a Lifetime of Tradition“ (2017) nomli badiiy bo'lmagan kitoblar muallifidir.