Jung Kook

Jeon Jung-kook, professional sahnada Jung Kook nomi bilan tanilgan — Big Hit Music tarkibidagi janubiy koreyalik qo‘shiqchi, qo‘shiqnavis va prodyuser. U BTS guruhining eng yosh a'zosi. Jung Kook 2020-yilda «Still With You» va 2022-yilda «My You» kabi o‘zi prodyuserlik qilgan raqamli singllarini chiqargan. 2022-yilda amerikalik xonanda Charlie Puth bilan birgalikda «Left and Right» singlini ijro etgan, u Billboard Hot 100 ro‘yxatida 22-o‘ringa ko‘tarilgan. O‘sha yili u FIFA Jahon chempionati uchun «Dreamers» qo‘shig‘ini taqdim etgan va ochilish marosimida chiqish qilgan birinchi janubiy koreyalik artistga aylangan. 2023-yilda u Latto ishtirokida «Seven» singlini chiqargan va ko‘plab rekordlarni yangilagan. Qo‘shiq Billboard Hot 100, Global 200 va Global Excl. US chartlarida birinchi o‘rinni egallab, Spotify tarixida 1 milliard oqimga (stream) eng tez erishgan taronaga aylangan. Uning Jack Harlow ishtirokidagi «3D» singli ham chartlarda muvaffaqiyat qozongan. Uning «Golden» nomli debyut albomi 2023-yil noyabrda chiqarilgan bo‘lib, «Standing Next to You» singli bilan birga dunyo miqyosida katta e'tibor qozondi.