Jules Berry

Jules Berry (asli ismi Marie Louis Jules Paufichet; 1883-yil 9-fevral – 1951-yil 23-aprel) – fransuz aktyori. Uning ota-onasi Poitou shahrida savdo bilan shug'ullangan. 1888-yilda oilasi Parijga ko'chib o'tadi. Berry Lycée Louis-le-Grand'ni tamomlab, so'ngra Milliy tasviriy san'at oliy maktabini bitirgan. Talabalik yillarida uning teatrga bo'lgan qiziqishi uyg'onadi. Sinovlardan so'ng uni Théâtre Antoine-Simone Berriau teatri Leon Hennigning "La Mort du duc d'Enghien" va Artur Shnitslerning "Le Perroquet vert" spektakllarida o'ynash uchun ishga taklif qiladi. Keyinchalik u Théâtre de l'Ambigu-Comique va Théâtre de l'Athénée teatrlarida sahnaga chiqdi. Lione gastrelda yurgan paytida uni Jean-François Ponson payqab qoladi va Bryusseldagi Théâtre royal des Galeries Saint-Hubert teatriga 12 yillik shartnoma asosida ishga oladi. Bryussel tomoshabinlari uni iliq kutib olishadi, u yerda "Le Mariage de mademoiselle Beulemans" kabi sahna asarlarida rol o'ynagan. Shundan keyin Berry Marcel Achard, Alfred Savoir, Louis Verneuil va Roger Ferdinand asarlari asosida sahnalashtirilgan 30 ta muvaffaqiyatli spektaklda qatnashgan. Uning kinodagi ilk rollaridan biri Genri Desfontaines rejissyorligidagi "Oliver Cromwell" (1911) ovozsiz filmi bo'lgan. Ovozli kinodagi debyuti esa Suzy Prim bilan birga suratga tushgan "Mon coeur et ses millions" (1931) filmi hisoblanadi. Ijodiy faoliyati davomida Berry 89 ta filmda rol o'ynagan. Shaddod, dang'illama va injiq tabiatli Berry o'sha davrning Pierre Brasseur kabi boshqa taniqli san'atkorlari kabi o'ta yorqin va betakror ijrochi bo'lgan.