Jorge Luis Borges

Xorxe Fransisko Isidoro Luis Borxes Asevedo (1899-yil 24-avgust – 1986-yil 14-iyun) — argentinalik yozuvchi, esseist, shoir va tarjimon, ispan tilidagi adabiyot va jahon adabiyoti vakili. Uning 1940-yillarda yozilgan “Ficciones” va “El Aleph” asarlari tushlar, labirintlar, tasodiflar, cheksizlik va mifologiya kabi mavzularni qamrab olgan eng mashhur hikoyalar to‘plamidir. Borxes ijodi falsafiy adabiyot va fantastika janriga katta hissa qo‘shgan, shuningdek, XX asr Lotin Amerikasi adabiyotidagi sehrli realizm oqimiga kuchli ta’sir ko‘rsatgan. Buenos-Ayresda tug‘ilgan ijodkor 1914-yilda oilasi bilan Shveytsariyaga ko‘chib o‘tgan va u yerda ta’lim olgan. Yevropa bo‘ylab sayohatlardan so‘ng, 1921-yilda Argentinaga qaytib, she’r va esselarini surrealistik jurnallarda chop eta boshlagan. Kutubxonachi va ma’ruzachi sifatida ishlagan, 1955-yilda Milliy kutubxona direktori va Buenos-Ayres universiteti professori etib tayinlangan. 55 yoshida to‘liq ko‘rish qobiliyatini yo‘qotgan bo‘lsa-da, olimlar uning ko‘zi ojizligi yangicha adabiy ramzlarni yaratishiga ko‘maklashgan deb hisoblashadi. 1960-yillarga kelib, asarlari AQSh va Yevropada keng tarqalgan. Borxes bir nechta xorijiy tillarni mukammal bilgan.