Jon Voight

Jonatan Vinsent "Jon" Voight (1938-yil 29-dekabrda tugʻilgan) — amerikalik aktyor. U bitta "Oskar" (toʻrtta nominatsiyadan) va uchta "Oltin globus" mukofoti sovrindori. Voight 1960-yillarning oxirida "Midnight Cowboy" (1969) filmidagi bosh rol orqali eʼtibor qozongan. 1970-yillarda "Deliverance" (1972) filmidagi qotillikka aralashib qolgan tadbirkor, "Coming Home" (1978) filmidagi Vetnam urushi qatnashchisi (ushbu roli uchun "Eng yaxshi aktyor" nominatsiyasida "Oskar" mukofotini olgan) hamda "The Champ" (1979) filmidagi kambagʻal sobiq boks chempioni obrazlari bilan Hollywood yulduziga aylandi. 1980-yillarda uning ijodiy faoliyati biroz sekinlashgan boʻlsada, "Runaway Train" (1985) filmidagi rahmsiz bank qaroqchisi roli uchun tanqidchilar olqishiga sazovor boʻldi. 1990-yillarda esa u "The Rainmaker" (1997) filmida hiyla-gardan advokat obrazini gavdalantirdi. 2000-yillarda Voight "Ali" (2001) filmida sport sharhlovchisi Howard Cosell, "Uprising" (2001) filmida natsist zobiti Jürgen Stroop va shu nomdagi telefilmda (2005) Rim papasi Ioann Pavel II rollarini mahorat bilan ijro etdi. Voight aktrisa Angelina Joliening otasi hisoblanadi.