Joe Anoa'i

Leati Joseph Anoaʻi (1985-yil 25-mayda tugʻilgan), asosan Roman Reigns ring nomi bilan tanilgan — amerikalik professional kurashchi va sobiq futbolchi. U WWE tashkiloti bilan shartnoma imzolagan boʻlib, SmackDown brendida chiqish qiladi. Dunyodagi eng yaxshi professional kurashchilardan biri sifatida eʼtirof etilgan Reignsʼning WWE Universal chempionligini 1316 kun davomida saqlab qolgani WWE tarixidagi toʻrtinchi eng uzoq davom etgan jahon chempionligi va 1988-yildan beri eng uzoq davom etgan chempionlik unvoni hisoblanadi. Georgia Tech jamoasida talabalar oʻrtasida Amerika futboli oʻynaganidan soʻng, Anoaʻi 2007-yilda Milliy futbol ligasining (NFL) «Minnesota Vikings» va «Jacksonville Jaguars» jamoalarida qisqa muddatli mavsumoldi sinovlaridan oʻtib, professional futbol karyerasini boshladi. 2008-yilda Kanada futbol ligasining (CFL) «Edmonton Eskimos» jamoasida toʻliq mavsum oʻynagach, u futboldan ketishini eʼlon qildi. Mashhur Anoaʻi kurashchilar sulolasining vakili boʻlgan Anoaʻi 2010-yilda WWE bilan shartnoma imzoladi va 2012-yilda Roman Reigns ring nomi bilan Din Embros va Set Rollins bilan birgalikda «The Shield» guruhi tarkibida asosiy rostere debyut qildi. Rollins bilan birgalikda Reigns bir marta WWE jamoaviy chempionligini qoʻlga kiritgan. Uchlik 2014-yilgacha birga chiqish qildi, shundan soʻng Reigns yakkakurashlarga oʻtdi. 2014–2020-yillar oraligʻida WWE Reignsʼni ijobiy qahramon sifatida koʻrsatib, uni kompaniyaning navbatdagi “yuziga” aylantirishga harakat qildi, biroq bu tomoshabinlar va tanqidchilar tomonidan keskin norozilik bilan qarshi olindi. Ushbu davrda Reigns uch marta WWE chempionligini qoʻlga kiritdi.