Joan Crawford

Joan Crawford (haqiqiy ismi Lyusil Fey LeSyuer; 1906-yil 23-mart — 1977-yil 10-may) — amerikalik aktrisa. Faoliyatini ko‘chma teatr truppalarida raqqosa sifatida boshlagan va Brodveyda debyut qilgan. 1925-yilda u Metro-Goldwyn-Mayer studiyasi bilan shartnoma imzolaydi. Dastlab rollarining sifati va hajmidan qoniqmagan aktrisa, o‘zini ommalashtirish kampaniyasini boshlab, 1920-yillarning oxiriga kelib mashhur flapper timsolini yaratdi. 1930-yillarda uning shuhrati MGM’dagi hamkasblari Norma Shirer va Greta Garbo bilan tenglashdi. Crawford ko‘pincha qiyinchilik bilan muvaffaqiyatga erishgan va muhabbat topgan mehnatkash qizlar obrazini gavdalantirgan. Bunday “qashshoqlikdan badavlatlikka” o‘tish hikoyalari Buyuk Depressiya davri tomoshabinlariga, xususan, ayollarga juda ma’qul keldi. U Gollivudning eng yorqin yulduzlaridan va AQShdagi eng ko‘p maosh oluvchi ayollardan biriga aylandi, biroq keyinchalik filmlari daromad keltirmay qo‘ydi va 1930-yillarning oxirida “kassa zaharli” degan tamg‘ani oldi. Ekrandan ikki yil uzoqlashganidan so‘ng, Crawford “Mildred Pierce” (1945) filmidagi bosh roli bilan qaytdi va bu rol unga “Oskar” mukofotini taqdim etdi. 1955-yilda u Pepsi-Cola kompaniyasi prezidenti Alfred Stilga turmushga chiqdi. 1959-yilda eri vafotidan so‘ng, direktorlar kengashiga saylandi va 1973-yilgacha shu lavozimda ishladi. Aktrisa 1960-yillar davomida film va televideniyeda muntazam suratga tushib turdi, biroq keyinchalik uning faoliyati pasaya boshladi.