Jim Carrey

Jeyms Yujin Kerri — kanadalik va amerikalik aktyor hamda komik. O‘ta shijoatli va harakatchan qiliqlarga boy komedik rollari bilan tanilgan. U ikki karra "Oltin globus" mukofoti sovrindori bo‘lib, shuningdek BAFTA va AQSh Kinoaktyorlar gildiyasi mukofotlariga ham nomzod etib ko‘rsatilgan. 1980-yillarda komediyachi sifatida o‘z mahoratini oshirib, filmlarda ikkinchi darajali rollarni ijro etgan Kerri 1990–1994-yillarda Fox telekanalining "In Living Color" shousida suratga tushgach, tanila boshladi. U "Ace Ventura: Pet Detective", "The Mask", "Dumb and Dumber" (barchasi 1994), shuningdek, "Ace Ventura: When Nature Calls" va "Batman Forever" (ikkalasi ham 1995) kassa yig‘imlari yuqori bo‘lgan komediyalardagi bosh rollari bilan chinakam kino yulduziga aylandi. Ushbu beshta filmning muvaffaqiyati Kerri 1996-yilgi "The Cable Guy" filmidan boshlab, filmdagi ishtiroki uchun oldindan 20 million dollar gonorar olgan ilk komik aktyor bo‘lishini ta'minladi. Kerri keyinchalik "Liar Liar" (1997), "How the Grinch Stole Christmas" (2000), "Bruce Almighty" (2003), "Lemony Snicket's A Series of Unfortunate Events" (2004) va "Yes Man" (2008) kabi komediyalarda bosh rollarni muvaffaqiyatli ijro etdi. 2010-yillardan boshlab u filmlarda kamroq ko‘rindi, shunga qaramay "Dumb and Oumber To" (2014) hamda "Sonic the Hedgehog" (2020–hozirgacha) kinoqatoridagi doktor Eggman roli bilan e'tibor qozondi. Asosan komedik aktyor sifatida tanilganiga qaramay, Kerri dramatik rollarda ham muvaffaqiyat qozondi. Tanqidchilar tomonidan yuqori baholangan "The Truman Show" (1998) hamda "Man on the Moon" (1999) filmlaridagi bosh rollari uning ijodida alohida o‘rin tutadi.