Jerry Scheff

Bass-gitarachi Jerry Scheff San-Fransisko ko‘rfazi hududida ulg‘aygan. Maktabda tuba chalishni o‘rganib, yettinchi sinfdan kontrabasga o‘tgan. U asosan jaz va R&B yo‘nalishlariga qiziqqan. O‘n besh yoshida yangi yashash manzili bo‘lgan Sakramento hamda San-Fransiskodagi klublarda musiqa ijro eta boshlagan. Maktabni bitirish arafasida AQSh Harbiy-dengiz kuchlariga qo‘shilib, Vashingtondagi Harbiy-dengiz musiqa maktabiga tushgan. U yerda to‘qqiz oy davomida musiqa nazariyasi va garmoniyasini o‘rganib, taniqli sozandalar bilan birga musiqalar ijro etgan. Kurs tugagach, u yerda dars berishni davom ettirgan, bo‘sh vaqtlarida esa jaz klublarida qatnashgan. Keyinchalik flot uni San-Diegoga ko‘chirgan. Harbiy xizmatni tugatgandan so‘ng Los-Anjelesga ko‘chib o‘tgan va Watts shahridagi The Sands nomli klubda muntazam ravishda chiqish qilgan. Bu yerda o‘smir Billy Preston tez-tez James Brown qo‘shiqlarini kaver qilib ijro etardi. Qizig‘i shundaki, basschi Scheff o‘zining L.A.dagi studiyaviy faoliyatini valf trombonida chalishdan boshlagan. Scheff bass-gitarada ishtirok etgan ilk xit qo‘shiq The Association guruhining albomi bo‘lib, unga «Along Comes Mary» va «Cherish» singllari kirgan. «Mary» qo‘shig‘ida Scheff xatoga yo‘l qo‘ygan va bu xato trekda qoldirib yuborilgan. Shuning uchun radioda o‘z ijodini eshitganda bir tomondan quvonsa, ikkinchi tomondan har safar o‘sha xatosidan xijolat tortardi. Biroq bir necha yil o‘tgach, ushbu qo‘shiqning «lift musiqasi» shaklidagi kaverini eshitganida, boshqa basschi uning o‘sha xato notasi bilan qo‘shiqni aynan ko‘chirib chalganini ko‘rib ko‘ngli tasalli topgan. Uning faoliyatidagi eng yorqin voqealardan biri The Doors guruhining «LA Woman» albomida ishtirok etgani bo‘lgan.