Jennifer Lawrence

Jennifer Shrader Lawrence — amerikalik aktrisa va prodyuser. U jangari franshizalar hamda mualliflik dramalarida birdek suratga tushgan, uning ishtirokidagi filmlar dunyo bo'ylab 6 milliard dollardan ortiq daromad keltirgan. 2015 va 2016-yillarda dunyoning eng ko'p haq to'lanadigan aktrisasi deb topilgan. Lorens aktrisalik faoliyatini o'smirlik yoshida televideniedagi kichik epizodik rollardan boshlagan. Ilk yirik roli "The Bill Engvall Show" (2007–2009) sitkomidagi asosiy qahramon bo'lgan. 2008-yilda "Garden Party" dramasidagi yordamchi rol bilan kinoda debyut qilgan. "The Burning Plain" filmidagi ijrosi uchun Marcello Mastroianni mukofotiga sazovor bo'lgan. Uning karyerasidagi burilish nuqtasi "Winter's Bone" (2010) nomli mualliflik filmidagi kambag'al o'smir qiz roli bo'ldi va bu obraz unga "Eng yaxshi aktrisa" nominatsiyasida ilk bor "Oskar" mukofotini taqdim etdi. Lorens "X-Men" filmseriyasida (2011–2019) mutant Mystique hamda "The Hunger Games" franshizasida (2012–hozirgacha) Katniss Everdeen rollarini ijro etib, xalqaro miqyosda tanildi. Oxirgi franshiza uning qahramonini barcha davrlarning eng ko'p daromad keltirgan jangari film qahramoniga aylantirdi. Lorens rejissyor David O. Russell bilan uchta filmda hamkorlik qilgan va bu unga nufuzli mukofotlarni keltirgan. Jumladan, "Silver Linings Playbook" (2012) romantik dramasidagi ruhiy tushkunlikka tushgan yosh beva ayol roli uchun "Eng yaxshi aktrisa" yo'nalishida "Oskar" mukofotini qo'lga kiritib, 22 yoshida ushbu nominatsiya bo'yicha ikkinchi eng yosh g'olibga aylandi. Shuningdek, u "American Hustle" (2013) qora komediyasidagi yordamchi roli uchun BAFTA mukofotiga sazovor bo'lgan.