Janet Jackson

Janet Damita Jo Jackson (1966-yil 16-mayda tugʻilgan) — amerikalik qoʻshiqchi, qoʻshiq muallifi, raqqosa va aktrisa. Musiqiy jihatdan yangilikka intiluvchi, ijtimoiy mavzularni koʻtaruvchi va jinsiy erkinlikni targʻib qiluvchi albomlari, shuningdek, dabdabali sahna koʻrinishlari hamda kino va televidenifedagi rollari bilan tanilgan u 30 yildan ortiq vaqt davomida ommaviy madaniyatning koʻzga koʻringan namoyandasi boʻlib kelmoqda. Jacksonlar oilasining kenja farzandi boʻlib, ijodini 1976-yilda «The Jacksons» estrada teledasturida boshlagan va 1970-yillar hamda 1980-yillarning boshlarida «Good Times» va «Fame» kabi boshqa teleseriallarda ham suratga tushgan. 1982-yilda A&M Records bilan ovoz yozish shartnomasini imzolagach, u oʻzining uchinchi — «Control» (1986) studiyaviy albomi chiqqandan soʻng pop-musiqa ikonasiga aylandi. Prodyuserlar Jimmy Jam va Terry Lewis bilan hamkorlikda yaratgan musiqalarida ritm-n-blyuz, funk, disko, rap va industrial bitlar elementlarini uygʻunlashtirib, ommaviy musiqada katta muvaffaqiyatga erishdi. Albomlari, xoreografiyasi, musiqiy videolari hamda radioda tez-tez yangrashi bilan bir qatorda, u ijtimoiy ahamiyatga molik qoʻshiq matnlari bilan ham namuna sifatida eʼtirof etilgan. 1991-yilda u Virgin Records bilan oʻsha davr uchun rekord darajadagi koʻp million dollarlik ikki shartnomaning birinchisini imzoladi va industriyadagi eng koʻp haq oluvchi sanʼatkorlardan biriga aylandi. Uning ushbu leybl ostidagi debyut albomi — «Janet» (1993) uning ijodida jinsiy mavzularni oʻrganib borishi natijasida ommaviy jinsiy ramz (seks-simvol) qiyofasini shakllantirdi. Oʻsha yili u oʻzining ilk bosh rolni ijro etgan...