Jane Levy

Jeyn Kolbern Levi (1989-yil 29-dekabrda tugʻilgan) — amerikalik aktrisa. Stella Adler aktyorlik studiyasida oʻqigach, Showtime telekanalining «Shameless» (2011) komediya-dramasida asl Mendi Milkovich roli bilan debyut qilgan. Levi birinchi mavsumdan soʻng «Shameless»ni tark etib, 2011–2014-yillarda ABC telekanalining «Suburgatory» sitkomida bosh rolni ijro etdi. Kinoga oʻtib, rejissyor Fede Alvares bilan hamkorlik qilgan holda «Evil Dead» (2013) va «Don't Breathe» (2016) qoʻrqinchli filmlarida bosh rollarni oʻynadi. Hulu telekanalining «There's... Johnny!» (2017) komediya-dramasi va «Castle Rock» (2018) qoʻrqinchli fantastika seriallarida doimiy rollarni ijro etib televideniyega qaytdi, shuningdek, Netflix’ning «What/If» (2019) triller miniserialida bosh rolni ijro etdi. 2020–2021-yillarda Levi NBC telekanalining «Zoey's Extraordinary Playlist» nomli musiqiy komediya-dramasida bosh qahramon rolini oʻynadi va buning uchun "Eng yaxshi aktrisa – musiqiy yoki komediya seriali" nominatsiyasida Oltin globus mukofotiga nomzod boʻldi.