Jane Fonda

Jane Seymour Fonda (1937-yil 21-dekabrda tugʻilgan) — amerikalik aktrisa, faol va sobiq model. U ikki karra "Oskar", ikkita BAFTA, yettita "Oltin globus", "Primetime Emmy", shuningdek, AFI umrbod muvaffaqiyat mukofoti, "Oltin sher", Faxriy "Oltin palma yaprogʻi" va Sesil B. Demill mukofoti kabi nufuzli sovrinlar bilan taqdirlangan. Sotsialit Frensis Ford Seymur va aktyor Genri Fondaning qizi boʻlgan Jeyn Fonda aktrisalikdagi debyutini 1960-yilda Broadway’ning "There Was a Little Girl" spektaklida amalga oshirgan va bu roli uchun "Toni" mukofotiga nomzod boʻlgan. Shu yilning oʻzida "Tall Story" romantik komediyasida kino-debyutini qilgan. U 1960-yillarda "Period of Adjustment" (1962), "Sunday in New York" (1963), "Cat Ballou" (1965), "Barefoot in the Park" (1967) va "Barbarella" (1968) kabi komediyalar orqali mashhur boʻldi. Uning birinchi turmush oʻrtogʻi "Barbarella" filmining rejissyori Rojer Vadim boʻlgan. Yetti karra "Oskar" mukofotiga nomzod boʻlgan Fonda ilk nominatsiyasini "They Shoot Horses, Don't They?" (1969) filmi uchun olgan va 1970-yillarda "Klute" (1971) hamda "Coming Home" (1978) filmlari uchun ikki marta "Eng yaxshi aktrisa" nominatsiyasida "Oskar"ni qoʻlga kiritgan. Uning boshqa nominatsiyalari "Julia" (1977), "The China Syndrome" (1979), "On Golden Pond" (1981) va "The Morning After" (1986) filmlari bilan bogʻliq. Ketma-ket muvaffaqiyat qozongan "Fun with Dick and Jane" (1977), "California Suite" (1978), "The Electric Horseman" (1979) va "9 to 5" (1980) filmlari uning kassa yigʻimlarini taʼminlagan.