Jan Lenica

Jan Lenica (1928 yil 4 yanvar, Polsha, Poznan – 2001 yil 5 oktyabr, Berlin) — polshalik grafik-dizayner va rassom-karikaturachi. Varshava politexnika institutining arxitektura fakultetini tamomlagan Lenica afisha illyustratoriga aylandi va Walerian Borowczykning dastlabki animatsion filmlarida hamkorlik qildi. 1963–1986 yillarda Fransiyada yashab ijod qilgan, 1987 yildan boshlab Berlinda istiqomat qilgan. U ko'p yillar davomida Germaniya OTMlarida grafika, afisha va animatsion multfilm fanlaridan dars bergan, shuningdek, 1979 yilda Germaniyadagi Kassel universitetida animatsiya sinfining ilk professori bo'lgan. U o'zining ko'plab filmlarida, jumladan, ikkita to'liq metrajli film — "Adam 2" (1968) va "Ubu et la grande gidouille"da (1976 yil yaratilgan, biroq Fransiyada faqat 1979 yilda namoyish etilgan) qirqib ishlangan to'xtatilgan kadrli (stop-motion) animatsiya texnikasidan foydalangan. U 2001 yil 5 oktyabrda Germaniyaning Berlin shahrida vafot etgan.