James Cagney

Jeyms Frensis Kegni (1899-yil 17-iyul – 1986-yil 30-mart) — amerikalik kinoaktyor. Turli janrdagi rollari uchun nufuzli mukofotlarga sazovor bo'lgan bo'lsa-da, u ko'proq "qaysar yigitlar" obrazi bilan tomoshabinlarga yaxshi tanish. 1999-yilda Amerika kino instituti uni barcha davrlarning eng buyuk erkak yulduzlari ro'yxatida sakkizinchi o'ringa loyiq ko'rgan. Kegni sahnadagi ilk faoliyatini 1919-yilda "Every Sailor" revyusida ayollar kiyimida raqsga tushishdan boshlagan. Bir necha yil davomida vodevillarda raqqos va komik aktyor sifatida ishlab, 1925-yildan jiddiyroq rollarni ijro eta boshlaydi. "Penny Arcade" (1929) spektaklidagi muvaffaqiyatidan so'ng, Warners studiyasi u bilan haftasiga 500 dollar evaziga uch haftalik, keyinchalik esa yetti yillik shartnoma imzolaydi. Kegnining yettinchi filmi bo'lmish "The Public Enemy" o'sha davrning eng ta'sirli gangster filmlaridan biriga aylanadi. Ayniqsa, mashhur greypfrut sahnasi orqali u nafaqat Warners studiyasining, balki butun Gollivudning yirik yulduzlaridan biriga aylandi. 1938-yilda "Angels with Dirty Faces" filmi uchun ilk bor "Oskar" mukofotiga nomzod bo'lgan. 1942-yilda "Yankee Doodle Dandy" filmida Jorj M. Koen obrazini yaratib, eng yaxshi aktyor nominatsiyasida g'olib bo'lgan. 1955-yilda "Love Me or Leave Me" filmi uchun uchinchi bor nomzodlikni qo'lga kiritgan. 1961-yilda kino olamidan 20 yillik tanaffus olib, fermasida vaqt o'tkazgan. Keyinchalik insultdan tuzalish jarayonida "Ragtime" filmida rol ijro etgan.