Indra

Indra Kuldasaar (1967-yil 20-iyulda Shvetsiyaning Gyoteburg shahrida tug‘ilgan) — asosan Fransiyada tanilgan xonanda. Indra Shvetsiyada estoniyalik oilasida tug‘ilgan. 1980-yillarning oxirida Parijga ko‘chib o‘tgan modeli yigiti ortidan borib, Parijdagi tungi klublarning birida raqsga tushib yurgan vaqtida e’tiborga tushadi va tez orada unga qo‘shiq yozish bo‘yicha shartnoma taklif qilishadi. U fransuz super yulduzi Dalidaning akasi, prodyuser Orlando bilan hamkorlik qilib, 1990-yil oxirida o‘zining ilk "Let's Go Crazy" singlini chiqaradi. Osha davrdagi klub va haus uslubiga yaqin bo‘lgan ushbu rep tarona andergraunddan asosiy oqimga kirib keldi va Fransiya hit-paradida 11-o‘rinni egalladi. 1991-yilda Indraning ikkinchi singli — "Misery" raqs qo‘shig‘i Fransiyada 7-pog‘ulgacha ko‘tarildi. Unga Eddy Beatboxking nomi bilan tanilgan Valter Tayeb musiqiy bastalagan bo‘lib, so‘zlari amerikalik qo‘shiqnavis Keti Grier tomonidan yozilgan. Ushbu tarona hozirgacha Indraning eng mashhur hiti bo‘lib qolmoqda. Shundan so‘ng Valter Tayeb tomonidan yozilgan yana bir Top-10 talikka kirgan "Temptation" taronasi va shu yilning o‘zida xuddi shu nomdagi debyut albomi taqdim etildi (qo‘shiq matnlari yana Keti Grier'ga tegishli). Albom Fransiyada "Oltin" maqomini oldi va keyinchalik boshqa ayrim mamlakatlarda ham chiqarildi, biroq Indra Fransiyadan tashqarida katta muvaffaqiyatga erisha olmadi. Albomdagi to‘rtinchi va oxirgi singl — "Tell Me" 1992-yil boshida chiqarilib, Top-20 talikka kirdi. 1992-yil kuzida Indra ikkinchi albomining ilk singli bo‘lgan "Gimme What's Real"ni chiqardi. Singl Fransiya chartida 16-o‘ringacha ko‘tarilib, Indraning ketma-ket beshinchi Top-20 talikka kirgan hitiga aylandi. O‘sha davrda Indra fransuz tilida so‘zlashuvchi hududlarda juda mashhur edi.