Igor Maslennikov

Igor Fyodorovich Maslennikov (1931-yil 26-oktyabr, Nijniy Novgorod – 2022-yil 17-sentyabr) — sovet va rus kinorejissyori. 1954-yilda Leningrad universitetining jurnalistika fakultetini tamomlab, Leningrad televideniyesida muharrir, ssenariynavis va operator bo‘lib ishlagan. 1965-yilda «Lenfilm» qoshidagi Oliy rejissyorlik kurslariga (Grigoriy Kozintsev ustaxonasi) kirgan va keyinchalik shu kinostudiyada rejissyor sifatida faoliyat yuritgan. Maslennikov ijodiy yo‘lini 60-yillar oxirida «Kuzyayev Valentin shaxsiy hayoti» filmi bilan boshlagan. U bolalar uchun («Ertaga», «3-aprel»), sport mavzusida («Poygachilar») va tarixiy-kostyumli dramalar («Yaroslavna – Fransya qirolichasi») yo‘nalishida ijod qilgan. Shuningdek, natsistlar ishg‘oli davridagi fojiali voqealarni hikoya qiluvchi «Tosh osmon ostida» nomli sovet-norveg filmini suratga olgan. Rejissyorga eng katta muvaffaqiyatni Sherlok Xolms va doktor Uotson haqidagi turkum filmlar keltirdi. Vasiliy Livanov, Vitaliy Solomin, Borislav Brondukov, Rina Zelyonaya kabi aktyorlarning mahoratli tanlovi va rejissyorning iqtidori tufayli bu loyiha tomoshabinlar mehrini qozondi. 1985-yilda taqdim etilgan «Qishki gilos» melodramasi esa o‘sha davrning eng katta kassabop filmlaridan biriga aylandi.