Hilary Duff

Hilary Erhard Duff (1987-yil 28-sentyabrda tugʻilgan) — amerikalik aktrisa, xonanda va qoʻshiqnavis. U yetti karra Nickelodeon Kids' Choice Awards, toʻrt karra Teen Choice Awards va ikki karra Young Artist Awards mukofotlari sovrindori. Aktyorlik faoliyatini yoshligida boshlagan Duff „Lizzie McGuire“ teleseriali va shu nomdagi filmdagi (2003) bosh roli bilan „oʻsmirlar kumiri“ sifatida shuhrat qozongan. Keyinchalik „Cadet Kelly“ (2002), „Agent Cody Banks“ (2003), „Cheaper by the Dozen“ (2003) va „A Cinderella Story“ (2004) kabi mashhur filmlarda suratga tushdi. Keyingi yillarda u „War, Inc.“ (2008), „According to Greta“ (2009) hamda „The Haunting of Sharon Tate“ (2019) kabi mustaqil loyihalarda jiddiyroq rollarni ijro etdi. 2015-yildan 2021-yilgacha u TV Land kanalining „Younger“ serialida Kelsey Peters obrazini gavdalantirdi. 2022-yildan buyon „How I Met Your Father“ serialida Sophie rolini ijro etib, prodyuserlik ham qilmoqda. Musiqa olamida esa 2002-yilda chiqargan „Santa Claus Lane“ albomi bilan tanilgan boʻlsa, uning ikkinchi albomi — „Metamorphosis“ (2003) Billboard 200 chartida birinchi oʻrinni egallab, katta muvaffaqiyat qozongan.