Heath Ledger

Xit Endryu Lejer (1979-yil 4-aprel — 2008-yil 22-yanvar) — avstraliyalik aktyor va klipmeyker. 1990-yillarda bir nechta Avstraliya televideniyesi va kino loyihalarida rollar oʻynaganidan soʻng, Lejer kino karyerasini yanada rivojlantirish uchun 1998-yilda AQShga koʻchib oʻtdi. Uning filmografiyasi yigirmata kinokartinani oʻz ichiga oladi, ular orasida «Mening nafratlangan oʻnta xislatim» (1999), «Vatanparvar» (2000), «Ritsar qissasi» (2001), «Maxluqlar bazmi» (2001), «Dogtaun egalari» (2005), «Broubek togʻi» (2005), « Kendi» (2006), «Men u yerda emasman» (2007), «Toʻq qora ritsar» (2008) va «Doktor Parnassning xayoliy olami» (2009) bor; oxirgi ikkita film aktyor vafotidan keyin ekranlarga chiqqan. Shuningdek, u musiqa kliplarini produserlik qilgan, suratga olgan va kinorejissyor boʻlishni orzu qilgan. Lejer «Broubek togʻi» filmidagi Ennis Del Mar obrazi uchun Nyu-York kino tanqidchilari uyushmasining «Eng yaxshi aktyor» mukofotini va Avstraliya kino instituti tomonidan beriladigan «Eng yaxshi xalqaro aktyor» mukofotini qoʻlga kiritdi; u mazkur mukofotni vafotidan keyin olgan ilk aktyor boʻldi. U BAFTA, Kinoaktyorlar gildiyasi, «Oltin globus» va «Oskar» mukofotlarining «Eng yaxshi aktyor» nominatsiyalariga sazovor boʻlib, oʻsha paytda bu yoʻnalishdagi sakkizinchi eng yosh nomzodga aylandi. Shuningdek, amerikalik qoʻshiqchi va bastakor Bob Dilan hayoti hamda qoʻshiqlaridan ilhomlanib yaratilgan «Men u yerda emasman» filmidagi ijrosi uchun boshqa aktyorlar, rejissyor va kasting direktori bilan birgalikda 2007-yilgi Independent Spirit Robert Altman mukofotiga sazovor boʻldi. Filmda Lejer Robbie Klark ismli toʻqima aktyor obrazini gavdalantirgan.