Guy Pearce

Gay Edvard Pirs (1967-yil 5-oktyabrda tugʻilgan) — avstraliyalik aktyor va musiqachi. U "Primetime Emmy", shuningdek, "BAFTA" mukofotlarini qoʻlga kiritgan, "Oskar" va ikki bor "Oltin globus" mukofotlariga nomzod boʻlgan. Karyerasini Avstraliyaning "Neighbours" (1986–1989) teleserialida Mayk Yang rolini ijro etishdan boshlagan. Pirs "The Adventures of Priscilla, Queen of the Desert" (1994) filmidagi roli orqali xalqaro miqyosda eʼtirof etildi. Shundan soʻng Kertis Xansonning "L.A. Confidential" (1997) kriminal noarida Ed Eksli va Kristofer Nolanning "Memento" (2000) psixologik trillerida qisqa muddatli xotira yoʻqotilishidan aziyat chekuvchi erkak rolini oʻynadi. U, shuningdek, "The Time Machine" (2002), "Bedtime Stories" (2008), "The Road" (2009), "The Hurt Locker" (2009), "The King's Speech" (2010) va "Lawless" (2012) kabi filmlarda suratga tushgan. "Prometheus" (2012) hamda "Alien: Covenant" (2017) filmlarida Piter Veyland, Marvelning "Iron Man 3" (2013) jangari filmida Oldrich Killian, shuningdek, "Mary Queen of Scots" (2018) biografik dramasida Uilyam Sesil rollarini gavdalantirgan. Avstraliya kinosida esa "The Proposition" (2005), "Animal Kingdom" (2010) va "The Rover" (2014) kabi kartinalarda rol oʻynagan. "The Brutalist" (2024) filmidagi ijrosi uchun "Ikkinchi plandagi eng yaxshi aktyor" nominatsiyasida "Oskar" mukofotiga nomzod boʻlgan. 2012-yildan beri avstraliyalik yozuvchi Piter Templning "Jek Ayrish" hikoyalari asosida suratga olingan teledasturlarda bosh rolni ijro etib kelmoqda. Pirs HBO telekanalining "Mildred Pierce" (2011) va "Mare of Easttown" miniseriallarida ham suratga tushgan. Birinchi serialdagi roli uchun u "Primetime Emmy" mukofotiga sazovor boʻlgan.