Glenn Greenwald

Glenn Edward Greenwald (1967-yil 6-martda tug‘ilgan) — amerikalik jurnalist, yozuvchi va huquqshunos. 2014-yilda «The Intercept» nashriga asos solgan va 2020-yil oktyabrigacha u yerda muharrir bo‘lib ishlagan. Shundan so‘ng, mustaqil ravishda Substack platformasida maqolalar e’lon qila boshlagan. 1996-yilda konstitutsiyaviy huquqlar himoyasi bilan shug‘ullanuvchi yuridik firmaga asos solgan. 2005-yil oktyabridan AQSh hukumatining fuqarolik erkinliklariga nisbatan bosimlaridan xavotirga tushib, milliy xavfsizlik mavzularida blog yurita boshlagan. Iroq urushining qat’iy tanqidchisi va AQSh tashqi siyosatiga nisbatan doimo tanqidiy qarashlari bilan tanilgan.