Glen Campbell

Glen Travis Campbell (1936-yil 22-aprel – 2017-yil 8-avgust) — Grammy va Dove mukofotlari sovrindori, Golden Globe nomzodi, amerikalik kantri-pop xonandasi, gitarachi, teleboshlovchi va aktyor. U 1960 va 1970-yillardagi xit taronalari hamda CBS telekanalidagi “The Glen Campbell Goodtime Hour” shousi bilan tanilgan. 50 yillik ijodi davomida Campbell 70 dan ortiq albom chiqardi, 45 million nusxada plastinka sotdi va 12 ta RIAA oltin, 4 ta platina hamda bitta ikki karra platina albomga ega bo‘ldi. Uning 74 ta qo‘shig‘i kantri chartlariga kirib, 27 tasi Top 10 talikdan joy olgan. Uning eng mashhur hitlari qatorida “Gentle on My Mind”, “By the Time I Get to Phoenix”, “Wichita Lineman”, “Galveston”, “Rhinestone Cowboy” va “Southern Nights” bor. 1967-yilda Campbell bir vaqtning o‘zida kantri va pop yo‘nalishlarida to‘rtta Grammy yutib, tarixga kirdi. U Country Music Association (CMA) va Academy of Country Music (ACM) tomonidan “Yilning eng yaxshi erkak xonandasi” deb topilgan, 1968-yilda esa CMA’ning “Yil artisti” unvonini olgan. 1969-yilda aktyor John Wayne uni “True Grit” filmiga taklif etdi, bu rol unga Golden Globe nominatsiyasini keltirdi.