Gianna Nannini

Gianna Nannini (1954-yil 14-iyunda tugʻilgan) — italiyalik qoʻshiqchi va qoʻshiqlar muallifi. Uning "America" (1979), "Fotoromanza" (1984), "I maschi" (1987), "Meravigliosa creatura" (1995), "Sei nell'anima" (2006) va "Bello e impossibile" (1986) kabi qoʻshiqlari mashhur. Ayniqsa, oxirgi tarona Yevropada, jumladan Avstriya, Germaniya, Italiya va Shveysariyada xitga aylangan. Nannini 1954-yil 14-iyunda Sienada tavallud topgan. Uning kenja akasi Alessandro Nannini «Formula-1» poygachisi boʻlgan. 1970-yillarning oxirida Milanda fortepiano va kompozitsiyadan saboq olgan. U ilk muvaffaqiyatiga 1979-yilda chiqarilgan "America" singli va bir nechta Yevropa mamlakatlarida mashhurlikka erishgan California albomi orqali erishgan. Xalqaro miqyosdagi shuhrati esa 1984-yilda, Conny Plank produserligida yaratilgan oltinchi — Puzzle albomi chiqishi bilan boshlandi. Mazkur albom Italiya, Germaniya, Avstriya va Shveysariya chartlarining kuchli oʻntaligidan joy oldi. Albomdagi "Fotoromanza" singliga Michelangelo Antonioni rejissyorligida klip suratga olingan va u koʻplab musiqa mukofotlarini qoʻlga kiritgan. Nannini ushbu albomni qoʻllab-quvvatlash uchun yirik Yevropa turnesini uyushtirib, Montreux Jazz Festivalida bosh ijrochi sifatida sahnaga chiqqan. 1986-yilda uning "Bello e impossibile" qoʻshigʻi Italiya, Germaniya, Avstriya va Shveysariyada xit darajasiga yetdi. 1987-yilda chiqarilgan Maschi e altri nomli terma albomi bir milliondan ortiq nusxada sotilgan. 2004 yilda u Perle nomli eng sara qoʻshiqlar albomini taqdim etdi. Unda sanʼatkorning eng mashhur kompozitsiyalari Christian Lo kabi musiqachilar koʻmagida yangicha talqinda qayta ishlandi.