George Foreman

George Edward Foreman (taxallusi "Katta Jorj", 1949-yil 10-yanvarda tug'ilgan) — amerikalik ikki karra jahon chempioni, Olimpiada oltin medali sovrindori, baptist ruhoniy, yozuvchi va muvaffaqiyatli tadbirkor. U boks tarixidagi eng kuchli zarbaga ega bo'lgan sportchilardan biri hisoblanadi. O'z faoliyatining boshida 1973-yil 22-yanvarda Jo Freyzer ustidan qozongan g'alabasi va 1974-yil 30-oktyabrda Muhammad Aliga qarshi "Jangaldagi shovqin" nomli jangdagi mag'lubiyati bilan mashhur. 1994-yil 5-noyabrda 45 yoshida Maykl Murerni nokautga uchratib, 20 yildan ko'proq vaqt avval boy bergan chempionlik unvonini qaytarib olgan va tarixda og'ir vazn toifasidagi eng yoshi katta jahon chempioniga aylangan. Ring jurnali uni barcha davrlarning 25 ta eng yaxshi bokschisi qatoriga kiritgan. Hozirda u muvaffaqiyatli biznesmen va o'z cherkoviga ega nasroniy ruhoniydir. Foreman Ring jurnalining "Barcha davrlarning 100 ta eng kuchli zarba beruvchisi" ro'yxatida 9-o'rinda turadi va o'z nomi bilan ataluvchi "George Foreman Grill" bilan ham tanilgan.