GACKT

Gakuto Oshiro (1973-yil, 4-iyul) — yaponiyalik qo‘shiqchi, musiqachi, prodyuser va aktyor. U musiqachi oilasida dunyoga kelgan: otasi ham, onasi ham o‘qituvchi bo‘lishgan. Uch farzandning ikkinchisi bo‘lgan Gackt 3 yoshidan pianino va klassik musiqa nazariyasini o‘rgana boshlagan. O‘smirlik chog‘ida rok musiqasiga qiziqib, baraban va elektr gitara chalishni puxta o‘zlashtirgan. 1990-yillarning boshlarida ovoz rejissyori va studiya barabanchisi bo‘lib ishlagan bo‘lsa, o‘n yillikning o‘rtalariga kelib qo‘shiqchilik faoliyatini boshladi. "Cains:Feel" guruhidagi qisqa faoliyatdan so‘ng "Malice Mizer" rok guruhiga qo‘shildi. Guruhda vokalist, qo‘shiq matnlari muallifi va bastakor sifatida faoliyat yuritib, katta shuhrat qozondi. 1999-yilda guruhdan ketib, "Mizérable" nomli EP albomi bilan yakkaxon ijodini boshladi. Hozirga qadar to‘qqizta studiya albomi va o‘nlab singllarni taqdim etgan. Yaponiya, Osiyo va Yevropa bo‘ylab ko‘plab gastrollarda bo‘lgan. 15 yillik faoliyati davomida 43 ta singli ketma-ket "Oricon" musiqiy chartlarining kuchli o‘ntaligiga kirgan Gackt Yaponiya musiqa tarixidagi eng muvaffaqiyatli yakkaxon xonandalardan biri hisoblanadi.