Francis Ford Coppola

Francis Ford Coppola (1939-yil, 7-aprelda tug‘ilgan) — amerikalik kinoijodkor. U Gollivudning eng nufuzli va mashhur rejissyorlaridan biri hisoblanadi. 1970-yillar boshida an’anaviy qoliplarni buzuvchi g‘oyalari bilan tanilgan “Yangi Gollivud” avlodi vakili sifatida Jorj Lukas, Martin Skorseze, Robert Altman kabi rejissyorlar bilan bir qatorda tilga olinadi. 1970-yilda “Patton” filmi uchun “Oskar” mukofotiga sazovor bo‘lgan. Uning rejissyorlik faoliyatidagi eng katta muvaffaqiyati 1972-yilda chiqqan “Cho‘qintirgan ota” (The Godfather) filmi bo‘ldi. Film gangsterlar janrida inqilob qilib, tanqidchilar va tomoshabinlar olqishiga sazovor bo‘ldi. Coppola ushbu filmi uchun ikkinchi marta “Oskar”ni qo‘lga kiritdi. Uning “Cho‘qintirgan ota 2” (The Godfather Part II) filmi esa “Eng yaxshi film” nominatsiyasida “Oskar”ni yutgan tarixdagi ilk sikvel bo‘ldi. 1974-yilda u yozgan, rejissyorlik qilgan va prodyuserlik qilgan “The Conversation” filmi Kann kinofestivalida “Oltin palma yaprog‘i”ga munosib ko‘rildi. Keyingi yirik ijodiy loyihasi esa 1979-yilda ekranlarga chiqqan, suratga olish jarayonlari juda murakkab kechgan “Apocalypse Now” filmi edi.