Forest Whitaker

Forest Stiven Uitaker (1961-yil 15-iyulda tugʻilgan) — amerikalik aktyor, prodyuser, rejissyor va faol. U «Oskar», «Oltin globus», BAFTA va ikkita Kinoaktyorlar gildiyasi mukofotlari egasidir. 1982-yilda «Ridjmont oʻrta maktabidagi tezkor lahzalar» filmida debyut qilganidan soʻng, Uitaker «Vzvod» (1986), «Xayrli tong, Vyetnam» (1987), «Berd» (1988), «Yigʻloqi oʻyin» (1992), «Feneomen» (1996), «Ruh-it: Samuray yoʻli» (1999), «Buyuk munozarachilar» (2007), «Batler» (2013), «Kelishuv» (2016) va «Hurmat» (2021) kabi filmlardagi chuqur psixologik tahlilga asoslangan rollari bilan shuhrat qozondi. Shuningdek, u «Qoʻrqinchli xona» (2002), «Roug One: Yulduzli urushlar tarixi» (2016, Sov Gerrera roli) va «Qora Pantera» (2018, Zuri roli) kabi blokbasterlarda ham ishtirok etgan. Britaniyaning «Shotlandiyaning oxirgi qiroli» (2006) tarixiy dramasida ugandalik diktator Idi Aminni gavdalantirgani uchun Uitaker «Eng yaxshi aktyor» nominatsiyasida «Oskar» mukofotini qoʻlga kiritdi. Uitaker rejissyorlikdagi debyutini 1993-yilda «Bogʻlanganlar» nomli televizion film bilan boshlagan va «Nafasingni rostla» (1995), «Umid qanotlarida» (1998) hamda «Birinchi qiz» (2004) filmlarini suratga olgan. Aktyorlikdan tashqari, Uitaker oʻzining gumanitar faoliyati hamda ijtimoiy faolligi bilan ham tanilgan. 2011 yilda u YUNESCOning niyat elchisi etib tayinlangan, keyinchalik Tinchlik va yarashuv boʻyicha maxsus elchi maqomini olgan hamda notijorat tashkilot hisoblangan Whitaker Peace and Development Initiative (WPDI) rahbari sifatida faoliyat yuritib kelmoqda.