Erik Balling

Erik Balling XX asrning eng sevimli daniyalik kinoijodkorlaridan biri bo‘lgan. U rejissyor, produser va ssenariynavis sifatida faoliyat yuritgan. Erik Balling asosan "Matador" va "Huset På Christianshavn" kabi mashhur teleseriallari hamda "Olsen banden" film-seriyalari orqali tanilgan. U 1925-yil 19-noyabrda Daniyaning Nyborg shahrida ruhoniy oilasida tug‘ilgan. 1946-yilda dunyodagi eng qadimgi kinoishlab chiqarish kompaniyasi bo‘lgan "Nordisk Film Kompagni"ga yordamchi sifatida ishga kirgan. Uning iste’dodi tezda e’tirof etilib, ko‘p o‘tmay rejissyor sifatida ishlay boshlagan. Uning rejissyorlikdagi debyuti 1952-yilda "Vi arme syndere" filmi bilan amalga oshdi. Balling tez orada yaxshi texnik ko‘nikmalarga ega mutaxassis sifatida nom qozondi va shundan so‘ng uning iste’dodi keng tan olindi. 1957-yilda "Nordisk Film" rahbari etib tayinlandi va u kompaniya tarixidagi eng yosh rahbar bo‘ldi. Balling asosan komediya janridagi asarlari bilan tanilgan. Faoliyatining boshida o‘sha davrda juda mashhur bo‘lgan "Poeten og Lillemor" (1959) va "Sommer i Tyrol" (1964) filmlarini suratga olgan. 1960-yillarning o‘rtalarida Balling komediya yo‘nalishidagi uslubini o‘zgartirishga harakat qiladi. Shu davrda butun dunyoga mashhur bo‘lgan Jeyms Bond filmlari shuhrat qozongan edi. Balling Henning Bahs bilan hamkorlikda shu filmlardan ilhomlangan holda Jeyms Bond parodiyasi – "Slå Først Frede" (1965) komediyasini yaratdi. Film Daniyada shu qadar mashhur bo‘ldiki, uning davomi – "Slap af, Frede!" (1966) filmi suratga olindi. Henning Bahs bilan bu ijodiy hamkorlik shunchalik samarali bo‘ldiki, ular birgalikda yana ko‘plab filmlar yaratishdi.