Emin Alper

Emin Alper (Turkiyaning Karaman shahrida tugʻilgan) — turk kinorejissori va tarixchisi. Uning ilk toʻliq metrajli debyut ishi boʻlgan "Tep orti" (Beyond the Hill) filmi 62-Berlin kinofestivalida Kaligari kino mukofotini va Osiyo-Tinch okeani ekran mukofotlarida "Eng yaxshi film" unvonini qoʻlga kiritdi. Ikkinchi badiiy filmi "Quturish" (Frenzy) 72-Venetsiya xalqaro kinofestivalining asosiy tanlovida namoyish etilib, Hakamlar hayʼatining maxsus mukofotiga sazovor boʻldi. Talabalik yillarida Emin Alper Bogʻazichi universiteti kino klubining faol aʼzosi boʻlib, boʻsh vaqtining koʻp qismini doʻstlari bilan kino muhokamasiga bagʻishlagan. Ular davrning taniqli kinijodkorlari Nuri Bilge Ceylan va Zeki Demirkubuzni taklif qilib, seminarlar tashkil etishgan. Ssenariy va kino taqrizlari yoza boshlagan. Doʻstlari bilan birgalikda "Görüntü" nomli kino jurnalini chop etgan. Aynan talabalik yillari uning kinoga boʻlgan umrbod muhabbatini shakllantirib, kelajakda rejissyorlikni kasb sifatida tanlashiga turtki boʻlgan. Universitetning iqtisodiyot fakultetini tamomlagach, Alper ilmiy ishlarini davom ettirib, zamonaviy turk tarixi boʻyicha fan doktori (PhD) ilmiy darajasini oldi. Keyinchalik Istanbul texnika universitetining ijtimoiy fanlar kafedrasida dars bera boshladi. "Tarih ve Toplum", "Birikim", "Mesele" va "Altyazi" kabi bir qancha jurnallarda kino va siyosat mavzusida maqolalar yozgan. Boshqa rejissyorlarning ishlarini kuzatish va ularning qisqa metrajli filmlarida rol oʻynash orqali tajriba orttirgan Emin Alper 2005-yilda "Maktub" (The Letter) va 2006-yilda "Rifat" nomli ilk mustaqil qisqa metrajli filmlarini suratga oldi. Oxirgi filmi Buxarest xalqaro kinofestivalida "Eng yaxshi qisqa metrajli film" mukofotini qoʻlga kiritgan.