Elvis Presley

Elvis Aaron Presley (1935-yil, 8-yanvar – 1977-yil, 16-avgust) — amerikalik qo'shiqchi, tadbirkor va aktyor. "Rok-n-roll qiroli" nomi bilan tanilgan Elvis XX asrning eng ta'sirli madaniyat vakillaridan biri hisoblanadi. Uning ijro uslubi va shaxsiyati o'sha davrdagi musiqa dunyosida ham muvaffaqiyat, ham bahs-munozaralarga sabab bo'lgan. Misisipi shtatining Tupelo shahrida tug'ilgan Elvis 13 yoshida oilasi bilan Memfisga ko'chib o'tgan. Musiqa faoliyatini 1954-yilda Sun Records studiyasida prodyuser Sem Fillips bilan boshlagan. Skotti Mur va Bill Blek hamrohligida u rokabilli janrining kashshofiga aylandi. 1956-yilda uning "Heartbreak Hotel" singli AQSh chartlarida birinchi o'rinni egalladi va ko'p o'tmay millionlab nusxada sotildi.