Elizabeth Mitchell

Elizabeth Joanna Mitchell (qizlik familiyasi Robertson; 1970-yil 27-martda tugʻilgan) — amerikalik aktrisa. ABC telekanalining "Lost" serialidagi doktor Juliet Burke hamda "V" serialidagi FBR agenti Erica Evans rollari bilan tanilgan. U shuningdek, "The Santa Clause 2", "The Santa Clause 3: The Escape Clause" va "Gia" kabi filmlarda bosh rollarni ijro etgan. Mitchell hozirda NBC telekanalida namoyish etilayotgan Erik Kripkening "Revolution" teleserialida bosh rollardan birini bajarmoqda. Oʻgay otasi Jozef Dey Mitchell va onasi Jozefin Marian Mitchell (qizlik familiyasi Jenkins) Dallasda faoliyat yurituvchi huquqshunoslardir. Mitchell onasi bilan 1970-yilda Teksas shtatining Dallas shahriga koʻchib oʻtgan va u yerda onasi 1975-yilda Jozef Mitchellga turmushga chiqqan. Mitchell tasviriy va sahna sanʼatiga ixtisoslashgan Booker T. Washington oʻrta maktabini tamomlagan. U uch singilning toʻngʻichi boʻlib, singillari Kristina Helen "Kristie" Mitchell (1977-yilda tugʻilgan) va Katerin Dey "Kate" Mitchell (1981-yilda tugʻilgan) hisoblanadi. 1991-yilda Stephens kollejining aktyorlik boʻyicha tasviriy sanʼat bakalavri darajasini olgan hamda Britaniya-Amerika drama akademiyasida tahsil olgan. Mitchell Dallas teatr markazida olti yil va Encore teatrida bir yil faoliyat yuritgan. Mitchell "ER" teleserialining 2000–2001-yilgi mavsumida doktor Kerri Uiverning (Lora Innes) ilk lesbiya sevgilisi boʻlgan psixiatr doktor Kim Legaspi rolini ijro etgan. Shuningdek, u "Gia" filmida Anjelina Jolidining sartaroshi va sevgilisi rolini oʻynagan. 2009-yil mart oyida Entertainment Weekly nashri Mitchell klassik ilmiy-fantastik teleserialningrimeykti boʻlgan ABC telekanalining "V" nomli yangi loyihasiga tasdiqlangani haqida xabar bergan.