Elisabeth Moss

Elisabeth Singleton Moss (1982-yil 24-iyulda tugʻilgan) — amerikalik aktrisa va prodyuser. Bir nechta dramatik seriallardagi rollari bilan tanilgan boʻlib, ikki karra Primetime Emmy va ikki karra Oltin globus mukofotlari bilan taqdirlangan. Vulture nashri uni shu muvaffaqiyatlari bois "Peak TV qirolichasi" deb atagan. Moss 1990-yillarning boshlarida aktrisalikni boshlagan va NBC telekanalining The West Wing (1999–2006) siyosiy dramasida AQSh prezidenti Josiah Bartletning kenja qizi Zoey Bartlet rolini oʻynab tanilgan. AMC telekanalining Mad Men (2007–2015) tarixiy dramasida kotibadan matn muallifiga aylangan Peggy Olson rolini gavdalantirib, yanada kengroq shuhrat qozongan. BBC telekanalining Top of the Lake (2013) mini-serialida tergovchi obrazini yaratgani uchun Oltin globus mukofotiga sazovor boʻlgan. Hulu telekanalining distopik janrdagi The Handmaid's Tale (2017–hozirgacha) serialida bosh rolni ijro etgani hamda prodyuserlik qilgani uchun Primetime Emmy mukofotini qoʻlga kiritgan. Kino sohasida Girl, Interrupted (1999), Virgin (2003), Get Him to the Greek (2010), The One I Love (2014), Listen Up Philip (2014), Queen of Earth (2015), The Square (2017), The Seagull (2018), Her Smell (2018), Us (2019) va The Invisible Man (2020) kabi filmlarda suratga tushgan. Shuningdek, Brodvey sahnalarida David Mametning Speed the Plow hamda Wendy Wassermaning The Heidi Chronicles spektakllarida oʻynagan va oxirgisi uchun Toni mukofotiga nomzod boʻlgan.