Dolly de Leon

Dolly Earnshaw de Leon (1969-yil, 12-aprel) – filippinlik aktrisa. Asosan mustaqil kinolar va teatr sahnasidagi faoliyati bilan tanilgan. U FAMAS, Guldbagge va Los-Anjeles kinotanqidchilar uyushmasi mukofotlariga sazovor bo'lgan, shuningdek, Oltin globus va BAFTA mukofotlariga nomzod bo'lgan. 2023-yilda British Vogue jurnali uni dunyodagi eng mashhur 31 yulduz qatoriga kiritdi. Filippin universitetining Diliman filialida teatr yo'nalishida tahsil olgan aktrisa ijodini sahnadan boshlagan. Ilk rollari orasida "Venetsiyalik savdogar", "Godo'ni kutib", "Eski zamonlar" va "Medea" kabi mahalliy spektakllar bor. Kinodagi debyuti Peque Gallaga'ning "Shake, Rattle & Roll III" (1991) qo'rqinchli filmlar antologiyasidan boshlangan. Uzoq yillar davomida epizodik va kichik rollarda suratga tushgan aktrisaga 2019-yilda "Verdict" kriminal dramasidagi roli katta muvaffaqiyat keltirdi va u FAMAS mukofotiga loyiq deb topildi. 2021-yilda Lav Diazning "History of Ha" tarixiy dramasida yoshi o'tib qolgan ishchi obrazini yaratib, ijobiy fikrlar oldi. Keyinchalik Erik Mattining HBO kanali uchun ishlangan "On the Job" va "Folklore" loyihalarida o'zini yanada namoyon etdi. Ruben Östlundning "Triangle of Sadness" (2022) hajviy filmida hashamatli yaxtadagi farrosh roli unga xalqaro shuhrat keltirdi.