Divine

Divine (haqiqiy ismi Harris Glenn Milstead; 1945–1988) — amerikalik aktyor, qo'shiqchi va dreg-kuin. People jurnali tomonidan “Asrning dreg-kuini” deb e’tirof etilgan ijodkor kinoda ham, teatrda ham ko'pincha ayollar obrazlarini gavdalantirgan. Shunga qaramay, u o'zini xarakterli aktyor deb bilgan va keyingi filmlarida erkaklar rollarini ham ijro etgan. U asosan rejissyor John Waters bilan hamkorligi orqali tanilgan va uning o'nta filmida, ko'pincha bosh rollarni o'ynagan. Aktyorlik bilan bir qatorda, 1980-yillarda diskoteka qo'shiqchisi sifatida muvaffaqiyat qozongan va o'z davrida dunyodagi eng talabgir diskoteka ijrochilaridan biri sanalgan. Baltimorda badavlat oilada dunyoga kelgan Milstead 1960-yillarning o'rtalarida John Waters va uning “Dreamlanders” truppasi bilan yaqindan tanishadi. Uning “Mondo Trasho”, “Multiple Maniacs”, “Pink Flamingos” va “Female Trouble” kabi dastlabki filmlari keyinchalik kult maqomiga erishdi. 1970-yillarda Milstead teatr sahnasiga o'tib, “Women Behind Bars” va “The Neon Woman” kabi spektakllarda o'ynadi, ayni paytda “Polyester”, “Lust in the Dust” va “Hairspray” filmlarida suratga tushishni davom ettirdi.