Devrim Yakut

Devrim Yakut — turkiyalik aktrisa (teatr, serial va kinofilmlar) hamda aktyorlik mahorati murabbiyi. 1968-yil 27-mayda Anqarada tug'ilgan. 1992-yilda Anqara universiteti Til, tarix va geografiya fakultetining (DTCF) teatr bo'limini tamomlagan. Dastlab nazariy bilim olib, so'ngra aktyorlik bo'yicha tahsil ko'rgan. 1994-yilda Adana davlat teatrida faoliyatini boshlagan va 2003-yilgacha u yerda ishlagan. Shuningdek, Adana teatri qoshidagi ustaxonaning asoschilaridan biri sifatida prodyuserlik va murabbiylik qilgan. 2003-yilda Anqara davlat teatriga ishga o'tgan. 2005-yilgacha Anqara universiteti teatr bo'limida aktyorlik asoslaridan dars bergan. 2007-yilda Anqara davlat teatri direktor o'rinbosari, 2007-2008-yillarda esa direktori bo'lib ishlagan. 2006-2007-yilgi mavsumda "Kocasini Pisiren Kadin" spektakli bilan Asya Production Theatre'ga qo'shilgan. Hozirda Istanbuldagi Bahcesehir universitetining magistratura dasturida dars beradi. Mukofotlari: 2007-yilda Sadri Alisik teatr mukofotlarida "Musiqiy yoki komediya yo'nalishidagi eng yaxshi aktrisa" deb topilgan. Shuningdek, "5th Frank" spektakli uchun Anqara san'at jamg'armasining "Istiqlbolli aktrisa" mukofotini, "Tek Kisilik Sehir" uchun VIII Lions mukofotlari doirasida "Eng yaxshi aktrisa" unvonini va Anqara san'at jamg'armasining "Yilning eng yaxshi aktrisasi" mukofotini qo'lga kiritgan.