Claire Danes

Kler Ketrin Deyns (1979-yil 12-aprelda tugʻilgan) — amerikalik aktrisa. Uch karra «Primetime Emmy», toʻrt karra «Oltin globus» va ikki karra «Screen Actors Guild» mukofotlari sovrindori. 2012-yilda «Time» jurnali uni dunyodagi eng nufuzli 100 kishidan biri deb eʼlon qilgan, 2015-yilda esa Hollywood shon-shuhrat xiyobonidan yulduz bilan taqdirlangan. Deyns 1994-yilda efirga uzatilgan «My So-Called Life» oʻsmirlar dramatik serialidagi Anjyela Cheys roli orqali tezda tanildi. Ushbu ijrosi unga «Oltin globus» mukofoti hamda «Primetime Emmy» nominatsiyasini olib keldi. Oʻsha yili u «Little Women» (1994) filmida kinodagi debyutini qildi. Shuningdek, u «Home for the Holidays» (1995), «Romeo + Juliet» (1996), «The Rainmaker» (1997), «Les Misérables» (1998), «Brokedown Palace» (1999), «The Hours» (2002), «Terminator 3: Rise of the Machines» (2003), «Stardust» (2007) va boshqa koʻplab filmlarda suratga tushgan. 2010-yilda HBO telekanalining shov-shuvlarga sabab boʻlgan «Temple Grandin» filmida bosh rolni ijro etib, oʻzining ikkinchi «Oltin globus» va ilk «Primetime Emmy» mukofotini qoʻlga kiritdi. 2011–2020-yillarda esa «Showtime» telekanalining «Homeland» serialida Kerri Matison rolini ijro etgan.