Charlize Theron

Charlize Theron (1975-yil 7-avgustda tug'ilgan) — janubiy afrikalik va amerikalik aktrisa hamda prodyuser. Dunyoning eng ko'p haq oluvchi aktrisalaridan biri, "Oskar" va "Oltin globus" mukofotlari sovrindori, shuningdek, uch karra BAFTA va ikki karra Emmy mukofotlari nomzodi. 1990-yillarda Gollivudning "The Devil's Advocate" (1997), "Mighty Joe Young" (1998) va "The Cider House Rules" (1999) filmlarida bosh rollarni ijro etib, xalqaro miqyosda mashhurlikka erishgan. "Monster" (2003) filmidagi seriyali qotil Aileen Wuornos roli uchun "Kumush ayiq" va "Oskar" mukofotlarini qo'lga kiritib, aktyorlik yo'nalishida "Oskar" olgan birinchi janubiy afrikalik bo'lgan. "North Country" (2005) va "Bombshell" (2019) filmlaridagi rollari uchun yana ikki marta "Oskar"ga nomzod etilgan. Shuningdek, Jason Reitman'ning "Young Adult" (2011) va "Tully" (2018) komedik dramalaridagi ijrosi tanqidchilar tomonidan yuqori baholangan. Theron ko'plab kassabop jangari filmlarda, jumladan, "The Italian Job" (2003), "Hancock" (2008), "Prometheus" (2012), "Mad Max: Fury Road" (2015), "Atomic Blonde" (2017), "The Old Guard" (2020) va "Fast & Furious" franshizasining "The Fate of the Furious" (2017), "F9" (2021), "Fast X" (2023) qismlarida suratga tushgan.