Chandril Bhattacharya

Chandril Bhattacharya (1-mayda tug‘ilgan) – Hindistonning G‘arbiy Bengaliya shtati, Kalkuta shahridan bo‘lgan mashhur bengal sharhlovchisi, qo‘shiq matnlari muallifi, shoir, xonanda va rejissyor. Bhattacharya „Chandrabindoo“ bengal guruhi asosiy qo‘shiq matnlari mualliflaridan biri bo‘lib, vaqti-vaqti bilan ular uchun qo‘shiqlar ham kuylaydi. Uning o‘ziga xos matnlari satira va zamonaviy jamiyat tanqidiga boy. Chandril Anindya Chatterjee bilan birgalikda 2009-yilda suratga olingan „Antaheen“ filmidagi „Pherari Mon“ qo‘shig‘i uchun 2010-yilgi Milliy kino mukofotining „Eng yaxshi qo‘shiq matni“ nominatsiyasida g‘olib chiqqan. Chandril Bhattacharya ilgari „Anandabazar Patrika“ gazetasida har ikki haftada bir marta chop etiladigan „Uttam Madhyam“ ruknini yuritgan hamda o‘sha gazetaga maqolalar yozib turgan. Uning „Uttam Madhyam“dagi maqolalari keyinchalik kitob holida chop etildi. Shundan so‘ng u haftalik „Robbar Pratidin“ gazetasida „Du Chhokka Pnaach“ (mashhur Ludo o‘yinida bir yurishda olish mumkin bo‘lgan eng yuqori ball – „ikkita olti va bitta besh“) nomli ruknda o‘z qarashlarini bayon eta boshladi. 2011-yil yanvar oyidan boshlab uning bu maqolalari har ikki haftada ikkita chiqadigan bo‘ldi. Uning satirik qarashlari madaniy hodisalar, milliy va xalqaro siyosiy jarayonlar, inson psixologiyasi hamda ijtimoiy me'yorlarga bag‘ishlangan. U o‘z maqolalarining ko‘pchiligida o‘ziga xos iboralar, hazilomuz jargonlar va so‘z o‘yinlaridan foydalanib, bengal tilidagi so‘zlashuv ifodalarini absurd va kulgili tusga kiritadi.