Cem Yiğit Üzümoğlu

Cem Yiğit Üzümoğlu — turk teatr, televideniye va kino aktyori. Hacettepe universiteti Anqara davlat konservatoriyasining aktyorlik fakultetini tamomlagan. Hindiston va Polshada jismoniy teatr hamda zamonaviy raqs bo‘yicha tahsil olgan. Ko‘plab spektakllarda ishtirok etgan. 2017-yil aprel oyida 21-Afife teatr mukofotlari doirasida "Troas" spektakli uchun "Yilning eng muvaffaqiyatli yosh avlod aktyori" deb topilgan. 2018-yilda "Troas" va "Kalp" sahna asarlarida, 2019-yilda esa Ibrohim Chichek rejissyorligidagi "Evlat" spektaklida rol o‘ynagan. Televideniyedagi ilk qadami 2017-yilda Kanal D kanalida namoyish etilgan "Adi Efsane" serialidagi Hakan Sahin obrazi bo‘ldi. 29 qismdan iborat mazkur loyihada u o‘zining iste’dodi bilan tomoshabinlar e’tirofiga sazovor bo‘ldi. 2018-yilda Netflix’ning birinchi turk seriali "Hakan: Muhafiz"da Amir rolini ijro etdi. 2020-yilda Istanbul fathiga bag‘ishlangan "Rise of Empires: Ottoman" loyihasida Fatih Sulton Mehmed obrazida gavdalandi. 2021-yilda Netflix’ning "Kin" filmida bosh qahramon Emre/Tuncay Kökdemir rolini o‘ynadi. 2023-yilda Bina / Bant Mag. galereyasida "Loners In Wilderness" nomli ilk shaxsiy fotosuratlar ko‘rgazmasini ochdi. Ushbu ko‘rgazmadan 2000 ga yaqin surat orasidan tanlab olingan 46 ta qora-oq fotosurat o‘rin olgan.