Catherine Clinch

Ketrin Klinch (2009 yoki 2010 yilda tug'ilgan) — irlandiyalik yosh aktrisa. U o'zining kino debyutini "The Quiet Girl" (2022) filmida amalga oshirgan. Dublinning Ranela shahrida ulg'aygan. Uning otasi Tom Klinch fond brokeri, onasi Méav Ní Mhaolchatha esa qo'shiqchi. Ketrin yoshligidan aktyorlik kurslariga qatnagan. Klinch ekranda ilk bor Kolm Bairéadning "The Quiet Girl" (An Cailín Ciúin) filmida bosh rolni ijro etib ko'rinish berdi. U filmda 1981 yil yozini uzoq qarindoshining fermasida o'tkazuvchi 9 yashar vazmin qiz — Katedi gavdalantirgan. COVID-19 pandemiyasi davrida irland tilidagi maktablar bo'ylab o'tkazilgan kastinglarda asosan film tili bo'lgan irland tilida ravon gaplasha oladigan bosh aktrisa qidirilgan. Film prodyuserlari Ketrinning sinov yozuvini ko'rishlari bilan uni aynan shu rolga mos, film yukini ko'tara oladigan aktrisa ekanini darhol tushunishganini eslashadi. 2020 yilda suratga olinib, 2022 yilda ekranlarga chiqqan bu film tanqidchilar tomonidan yuqori baholanib, ayniqsa Ketrinning ijrosi alohida e'tirof etildi. U vazminlik bilan birga "chuqur hissiyotlar xazinasini" namoyish eta olgani uchun tahsinga sazovor bo'ldi. Mazkur roli uchun u 18-IFA mukofotlash marosimida "Eng yaxshi bosh rol aktrisasi" mukofoti bilan taqdirlandi.